top of page
لو كنت أكله
لكنت هبره نيّة
ضليت دق لحمك
ضليت دق فيك
لصرنا "ملسه" سوى...
لو كنت طبخه
لكنت عصفور
تيّان مقلي بدبس الرمان
بمصمص لحمك
قلّيتك، بهّرتك،
قرقشت عظامك...
طرقنا بعض حاف...
لو كنت خبصه
لكنت كافيار
كمشت سمكك النادر من فوق الموج
سحبت بيضك من تحت المي
مدّيتك على زبدتي
بلعنا بعض لقمة واحده...
لو كنت مشروب
لكنت شمبانيا
خضيّتك، خضّيتني،
فرنا، طرطشنا الدني...
لو كنت فاكهة
لكنت قشطه
كل بزرة ببوسه
وشو طيب بزر القشطه معك!
بس لأ،
لو كنت فاكهه،
لكنت حبة بلح،
خمّرتك على حرارة جسمي
حتى نقّط منّك...عسل.
لو كنت حلوى،
لكنت مهلبية
شربت عرقك عليّ حليب،
شرّبتك دمّي زهر معقود،
طلعت روحنا من الحلا... حلينا1
لو كنت للهضم،
لكنت قهوه مرّه
بتضل طعمتك على لساني
لحد ما إرجع جوع،
وإرجع آكلك،
بنهم!
bottom of page